UT-konur héldu morgunverðarfund miðvikudaginn 27. febrúar en fundurinn var haldinn í húsakynnum Microsoft við Engjateig.
Í upphafi fundar ávarpaði Sveinn Benediktsson fundargesti fyrir hönd Microsoft.
Hann sýndi okkur m.a. myndband um konur hjá Microsoft, en þar er sérstök áhersla lögð á að konur þroski sig í starfi.
Gestur fundarins, Guðný Káradóttir, sagði okkur svo frá því sem hún og félagar hennar hjá Gagarín eru að gera.
Fyrirtækið Gagarín sérhæfir sig í hönnun og framleiðslu á stafrænu efni fyrir gagnvirka miðla. Viðfangsefnin eru því margmiðlun af ýmsum toga, ráðgjöf, hönnun/viðmótshönnun, framleiðsla á efni og forritun á sérlausnum.
Áhersla er lögð á “User-centered-design” þar sem unnið er náið með notendum í öllum verkefnum.
Við upphaf verkefnis er áhersla lögð á að skilja aðstæður notenda og við gerð þarfagreiningar hitta þróunaraðila fulltrúa notenda, þannig að notandinn er með í ferlinu.
Bakgrunnur starfsmanna innan Gagarín er margvíslegur, en auk forritara eru þar hönnuðir og hugmyndasmiðir af ýmsum toga, sem sýnir að upplýsingatækniiðnaðurinn þarf meira en bara forritara 
Fyrirlestur Guðnýjar var afar áhugaverður.
